الفرق بين هارد SSD وهارد HDD

 

الهارد ال SSD هيفرق معايا أوى لو إشتريته .. سؤال محير 

الموضوع بسيط .. تعالى هقولك المختصر المفيد

الهاردات ال SSD حاليا رخصت جداً

ولو معاك 500 جنيه .. هتقدر تشترى هارد 128 جيجا .. جديد بالضمان

و لو معاك 900 جنيه .. هتشترى هارد 240 جيجا .. جديد بالضمان

و دى حاجة ممتازة .. و لازم تستغلها قبل تغيير الأسعار

الأسعار دى وقت تاريخ كتابة هذا الموضوع .. حالياً رخصت أكتر بمعدل 100 جنيه تقريباً

ثم إن ف وجهة نظرى أى جهاز بدايةً من الجيل التالت و ما يوازيه

لازم تجيبله SSD عشان تحس بـ قوة إمكانياته و تستغلها صح

نزلت إشتريته - خلاص جيبت الهارد !

تعالى بأه هعرفك أنا خدمتك إزاى :D

---------------------------------------------------------------

الوصف العام /

ال SSD ..هارد بيبقى حجمه الخارجى 2.5 إنش

و دا حجم أصغر من الهارد ال HDD العادى .. إللى بـ يبقى 3.5 إنش

ال SSD مصنع من مواد بلاستيكية أو معدنية رقيقة .. و وزنه خفيف جداً

بيبقى بين 75 جرام و 125 جرام .. تقريباً

ع عكس ال HDD إللى مصنع من المعدن و وزنه تقيل

و بيبقى بين 300 جرام و بيوصل لـ 1000 جرام .. تقريباً

و كلما إرتفعت مساحة ال HDD زاد وزنه نظراً لـ كِبر المكونات الداخلية

ال SSD بيركب ع أى لابتوب .. لإنه نفس حجم و مواصفات هارد اللاب

ال HDD بيركب ع ال PC فقط

ال SSD إستهلاكه لـ الكهرباء قليل جداً مقارنةً بـ ال HDD

و ممكن يشتغل ع أى وصلة USB بدون إحتياج باور خارجى

ع عكس ال HDD إللى لازمله باور خارجى عشان يشتغل مع الـ USB

طبعاً كلامى ع ال HDD الكبير بتاع الديسكتوب فى النقطة دى مش بتاع اللاب

هارد اللاب ال HDD بيشتغل ع أى وصلة عادى بدون باور

و كل الهاردات دى بتشتغل ع مخرج الساتا العادى ف البوردة بإختلاف سرعته

سواء ساتا 2 أو 3 .. و يستحسن ف ال ssd يكون بوردتك ساتا 3

و أغلب البورد الحديثة بتبقى ساتا 3 و بتدعمه بأعلى السرعات بدون مشاكل

-----------------------------------------------------------------

المميزات و تقنية العمل /

ال SSD زى ما واضح ف الصورة .. عباره عن شرايح صغيرة ع البوردة

حاجه كدا شبه الفلاشة كـ مثال .. مفيهوش إسطوانة و لا إبرة داخلية

أما الهارد ال HDD .. ميكانيكى العمل

زى ما شرحنا قبل كدا ف موضوع الهاردات

إنه هارد بيشتغل عن طريق دوران إسطوانة داخلية ع إبرة صغيرة

حاجة كدا زى الجرامافون و جهاز الإسطوانات بتاع زمان .. كـ مثال

و زى ما واضح من الكلام المبدئى عن التقنيتين إن ال SSD أسرع

لإنه لا بيحتاج إحتكاك و لا دوران مكونات معدنية و لا أى حاجة

مجرد شرائح ع بوردة بتشتغل بـ تكنولوجى فقط ...

و كـ تحديد أكتر .. الهارد ال SSD .. الفئة العادية المتداولة

بيبقى أسرع من ال HDD بحوالى 10 - 20 مرة

و الفئات العليا منه زى ال M2 - NVME .. إللى ف الصور شبه الرام كدا

و دى إصدارة جديده و تطوير ل ال SSD

بتوصل لـ 30 و 40 مره أسرع من ال HDD !

و ليها مخرج معين ع البوردة بعيداً عن كابلات الساتا

موجود ف الاجهزة الحديثة فقط

و طبعاً فرق السرعة دا هتشوفه ف أداء حاجات كتير

لو هتستخدم الهارد الإستخدام الشائع و تنزل عليه وندوز و برامج

فـ هتلاقى الوندوز و الجهاز بيفتحوا و البرامج بتحمل ف أقل من 10 ثوانى

ع عكس ال HDD إللى ممكن يقعد دقيقة و أكتر يفتح الجهاز

كذلك النقل من عليه أسرع من المعدل بتاع ال HDD

بس النقل من عليه لـ هارد زيه برضو ، عشان تحس بفرق ملحوظ

كمان لو حطيت عليه جيمز هتلاقي اللودنج إسكرين أسرع عن الطبيعى

بإختصار .. أى حاجة ع الهارد دا هتعملها

إضرب ادائها و سرعتها ف 10 أضعاف فيما فوق

و دا فرق جوهرى و يستاهل جداً دفع فلوس فيه

فيه ناس دايماً بتشتكى إن جهازها جيل حديث و إمكانياته عالية

لكن ف بطأ غريب و غير مبرر ف الأداء بشكل عام

و دا بيبقى فى أوقات كتيرة بسبب الهارد ال HDD

إللى بعتبره ف التجميعات العالية .. هو ف حد ذاته بوتل نك مع الجهاز

و حرام تجيب تجميعة ب 6000 مثلاً فيما فوق .. و متجيبش هارد SSD

يترجملك قوة التجميعة دى ف الأداء

كمان ال SSD مش بيجيله المشاكل بتاعة الهاردات العادية بنسبة كبيرة جداً

يعنى لا هتلاقى عليه باد سيكتور كل شوية و لا هتلاقي التقسيم حصل فيه مشكلة

هارد بيشتغل ف صمت و سريع و بن حلال

------------------------------------------------------------------

العيوب /

1 - السعر دا أول شئ طبعاً .. إللى رغم النزول الكبير ف الأسعار دا

يظل غالى برده مقارنةً بـ ال HDD

كـ مثال / هارد 1000 جيجا HDD بـ نفس سعر هارد 240 جيجا SSD

2 - الهيلث و البرفورمانس .. معرضين لإنهم يقلوا بشكل أكبر ف ال SSD

مش عارف ليه الحقيقة بس هو كدا

كـ مثال / لو هينقصوا ع ال HDD بنسبة 10% ف خلال 5 سنين

على ال SSD هينقصوا نفس النسبة ف سنتين و نصف ، و دا تقريبياً مش مقياس يعنى

و من خلال تجربتى ل SSD بأكتر من موديل ، كله نفس الكلام ف النقطة دى

و إللى ميعرفش .. الهيلث و البرفورمانس

فـ دول عبارة عن .. عمر الهارد الإفتراضى و كفائته

و دى حاجات بتتأثر بالإستخدام فترات طويلة للهارد

مثلا إنت واخد الهارد إللى جدك و من بعده والدك كانوا بيستخدموه

حد هيقولى هو كان ع أيام جدى SSD

اقوله أه يا بو لسان طويل :D

كمان بيتأثر بعدد مرات النسخ ع الهارد و بـ الفورمات

و بـ التقسيمة الصح .. و السيستم إللى عليه

و بـ الإعتناء بيه و المحافظة من أى خبطات أو توصيلات خطأ

هو بيتلكك الحقيقة يعنى و بياخد ع خاطره من أقل حاجة :D

لكن متقلقش خالص .. أيا كان نسبة الهيلث و البرفورمانس

طالما فوق ال 60 % .. فـ إنت كدا هاردك زى الفل و هيعيش معاك حبة حلوين